Friday, January 15, 2021
Home > mophosala > (नेकपा) को स्थायी कमिटी बैठक अनिश्चितकालका लागि स्थगित

(नेकपा) को स्थायी कमिटी बैठक अनिश्चितकालका लागि स्थगित

काठमाडौँ । सत्तारुढ दल नेपाल कम्युनिस्ट पार्टी (नेकपा) को स्थायी कमिटी बैठक अनिश्चितकालका लागि स्थगित भएको छ । महासचिव विष्णु पौडेलले आईतबार एक सुचना जारी गरी कात्तिक १२ र १३ गतेलाई तय भएको स्थायी कमिटी बैठक अर्को सुचना जारी नहुँदा सम्मका लागि स्थगित भएको जनाएका छन् ।

यसअघि पार्टी एकीकरणका काम, कार्य्िवभाजन र सरकारका कामको समीक्षा लगायतका एजेण्डामा छलफल गर्ने गरी स्थायी कमिटी बैठकको मिति तय भएको थियो । गत बिहिबार बसेको नेकपाको सचिवालय बैठकले १२ र १३ गते बस्ने भनिएको स्थायी कमिटी बैठक तयारी नपुगेको भन्दै पछि सार्ने निर्णय गरेको थियो ।

सोही बैठकले तल्ला तहका संगठनको एकीकरण टुंगो लगाउन साथै केन्द्रीय सदस्यहरुको कार्य विभाजनका लागि भन्दै दुई सदस्यीय कार्यदल गठन गरेको थियो । कार्यदलमा महासचिव विष्णु पौडेल र सचिवालय सदस्य रामबहादुर थापा रहेका छन् ।

कार्यदलले प्रदेश कमिटीलाई पूर्णता दिनेछ भने जिल्ला र जनवर्गिय संगठनको पनि टुंगो लगाउने छ । सोही कार्यदलले केन्द्रीय सदस्यको कार्य विभाजन र केन्द्रीय विभाग, अन्य कमिटी, पोलिटव्यूरो गठन गर्ने लगाएतका कामको पनि टुंगो लगाउने छ ।

कार्यदलले काम सम्मपन्न गरेपछि पुन सचिवालयको बैठक बस्ने छ । सचिवालय बैठकले कार्यदलले तयार पारेको रिपोर्टका आधारमा स्थायी कमिटीका लागि प्रस्ताव तयार गर्ने छ । त्यसपछि मात्रै स्थायी कमिटी बैठकको मिति तय हुने बताईएको छ ।

तर, पार्टी एकीकरणको पाँच महिना बिति सक्दा अहिले सम्म दुईपटक मात्रै स्थायी कमिटीको बैठक बस्न सकेको छ । कार्तिक १२ र १३ गतेको तेस्रो बैठक पनि स्थगित भएपछि नेकपाका नेताहरुमा अन्यौलता बढेको छ । नेताहरुले बारम्बार बैठकको माग गरेपनि नेतृत्वले वास्ता गरेको छैन ।

पार्टी विधानमा स्थायी कमिटीलाई निर्णायक बनाइए पनि पछिल्लो समय नेकपाका महत्वपूर्ण निर्णय ९ सदस्यीय सचिवालयले गर्दै आएको छ । जसको पार्टी्भित्रैबाट आलोचना बढ्दो छ । स्थायी कमिटी बैठक गत साउनदेखि पौँचौ पटक स्थगित भएको छ ।

Leave a Reply