Wednesday, January 27, 2021
Home > mophosala > ‘यो मेरो अधिकार हो’ भन्दै ब्राजिलका राष्ट्रपति बोल्सोनारोले गरे कोरोनाको खोप नलिने घोषणा

‘यो मेरो अधिकार हो’ भन्दै ब्राजिलका राष्ट्रपति बोल्सोनारोले गरे कोरोनाको खोप नलिने घोषणा

एजेन्सी

ब्राजिलका राष्ट्रपति जैर बोल्सोनारोले कोरोनाभाइरसविरुद्धको खोप प्रयोगमा आएपनि आफूले भने प्रयोग नगर्ने घोषणा गरेका छन्।

बिहीबार उनले आफ्नै सरकारले त्यसलाई ग्रहण गर्ने निर्णय गरेपनि आफूले त्यसलाई ग्रहण नगर्ने घोषणा गरेका हुन्।

सामाजिक सञ्जालमार्फत् सार्वजनिक गरिएको भिडियोमा उनले भनेका छन्, ‘म तपाईहरूलाई भन्छु की म त्यो (खोप) लिन्न । यो मेरो अधिकार हो।’

ब्राजिलमा अहिलेसम्म कोरोना भाइरसबाट सङ्क्रमित भएका मध्ये एक लाख ७० हजारभन्दा बढीको मृत्यु भइसकेको छ।

मृतकहरूको यो सङ्ख्या अमेरिकापछि विश्वमै सबैभन्दा धेरै हो। कोरोनाका कारण भएको मानवीय क्षतिको हिसावले ब्राजिल दोस्रो क्रममा रहेको छ।

अमेरिकामा अहिलेसम्म कोरोना भाइरसबाट सङ्क्रमित भएकामध्ये दुई लाख ६९ हजार ५७९ जनाको मृत्यु भएको छ।

सङ्क्रमितको सङ्ख्याको हिसावले दोस्रोमा रहेको भारत भने मृतकहरूको सङ्ख्याका आधारमा तेस्रोमा रहेको छ।

भारतमा कोरोनाका कारण मृत्यु भएको भनिएकाहरूको सङ्ख्या अहिलेसम्म एक लाख ३५ हजार ७५२ रहेको छ ।

विश्वमै दोस्रो धेरै मानवीय क्षति बेहोरेको मुलुक भएर पनि राष्ट्रपति बोल्सोनारोको अडान गलत भएको भन्दै धेरैले उनको आलोचना गरेका छन्।

कोरोना भाइरसको नियन्त्रणका लागि सरकारले गरेको कडाइप्रति उनले असहमति र असन्तुष्टि जनाउँदै आएका छन्।

उनले मास्क लगाउनु नपर्ने, सामाजिक दुरी काम गर्नु नपर्ने र कुनै सतर्कताको आवश्यकता नभएको दावी पनि गर्दै आएका छन्।

Leave a Reply