Wednesday, January 27, 2021
Home > mophosala > आज सबैको आँखा : सानेपामा १ बजे, बालुवाटारमा ४ बजे

आज सबैको आँखा : सानेपामा १ बजे, बालुवाटारमा ४ बजे

काठमाडौं –   सत्तारुढ नेकपा र प्रमुख प्रतिपक्षी दल नेपाली कांग्रेसको बैठक आज बस्दैछ । तिहार सुरु भएकै दिन दुवै दलको बैठक आज बस्न लागेको हो ।

सत्तारुढ नेकपाको सचिवालय र कांग्रेसको केन्द्रीय समिति बैठक बस्दैछ । त्यसैले आज सबैको ध्यान बालुवाटारमा अपराह्न ४ बजे र सानेपामा १ बजे गएको छ ।

दुवै दलले आ–आफ्नो बैठक राख्न धेरै रस्साकस्सी गर्नुपरेको थियो । नेकपाको सचिवालय बैठकमा प्रधानमन्त्री केपी ओलीको राजनीतिक भविष्य निर्धारण हुने विश्लेषण गरिएको छ ।

कांग्रेस बैठकमा भने १४औं महाधिवेशनको नयाँ मिति निर्धारण हुने अनुमान गरिएको छ । त्यसैले नेकपा र कांग्रेसको बैठकमा नेपाली जनताको चासो देखिएको हो ।

कोरोना महामारीका बेला पनि सरकार र प्रमुख प्रतिपक्षी दलले जनताको माग सम्बोधन गर्न नसकेको, आफैं आन्तरिक कलह र कुर्सी जोगाउन मात्र ध्यान गएको भन्दै नेताहरुको आलोचना भइरहेको छ । नेकपामा भने अवस्था अलि पेचिलो नै छ ।

प्रधानमन्त्री केपी ओलीले सरकार र पार्टी सञ्चालन एकलौटी गरेपछि प्रचण्ड, माधव नेपालहरु असन्तुष्ट छन् । त्यसैले आजको सचिवालय बैठकमा प्रचण्डले ओलीका अधिकार कटौती गर्ने वा उनलाई दुईमध्ये एक पदबाट अलग बस्न लगाउने प्रस्ताव पेस गर्नसक्ने चर्चा पनि छ ।

प्रचण्ड केही दिनदेखि राजनीतिक प्रतिवेदन लेखिरहेका छन् । ओलीले बिहीबार आफ्नो विरोध गर्ने पाँच नेतालाई सम्बोधन गरी पत्र लेखेको विषयले राजनीति फेरि तरंगित भएको छ ।

प्रधानमन्त्रीले अध्यक्ष प्रचण्डमाथि दर्जन आरोप लगाएका छन्। स्थायी कमिटीको म्यान्डेट पूरा गर्नतिर नलागेर गुटबन्दी गर्दै हिँडेको, पार्टी आन्दोलनलाई क्षयीकरण र क्रमशः विघटनको दिशातिर धकेलेको, कार्यकारी जिम्मेवारी पाएपछि सिन्को पनि नभाँचेको, एकता, एकीकरणका काम अलपत्र छाडेको, अध्यक्षको अभिभारा पूरा नगरेको र सरकारमाथि निरन्तर आक्रमण जारी राखेकोजस्ता आरोप लगाइएको स्रोतले जानकारी दियो ।

उता, कांग्रेसमा भने सभापति शेरबहादुर देउवाविरुद्ध रामचन्द्र पौडेल पक्षले घेराबन्दी गरिरहेको छ । देउवाले एकलौटी २० वटा केन्द्रीय विभाग गठन गरेको, क्रियाशील सदस्यता वितरणमा मनोमानी गरेको आरोप लगाइएको छ । त्यसैले आज सानेपा र बालुवाटारमा चर्काचर्की निकै पर्ने अनुमान गरिएको हो ।

मिडिया डबलीबाट साभार

Leave a Reply