Tuesday, January 26, 2021
Home > mophosala > दिल्लीको सीलमपुरमा हिंसात्मक प्रदर्शन, जामिया घटनामा कांग्रेसका पूर्व विधायकविरुद्ध जाहेरी

दिल्लीको सीलमपुरमा हिंसात्मक प्रदर्शन, जामिया घटनामा कांग्रेसका पूर्व विधायकविरुद्ध जाहेरी

नागरिकता संशोधन सम्बन्धी नयाँ कानूनको विरोधमा भारतका पूर्वोत्तर राज्यबाट सुरु भएको आन्दोलन अहिले भारतका अधिकांश क्षेत्रमा फैलिएको छ ।

विशेष गरी राजधानी दिल्लीमा प्रदर्शन बिस्तारित भएका छन् । तर शान्तिपूर्ण प्रदर्शनहरु हिंसामा परिणत भएका छन् ।

मंगलबार दिल्लीको सीलमपुर क्षेत्रमा शान्तिपूर्ण रुपमा प्रदर्शन सुरु भएको थियो र केही समयपछि सो प्रदर्शनले हिंसात्मक रुप लियो । एक हजार भन्दा बढी प्रदर्शनकारी रहेको भिडमा हिंसा भड्कियो । एक स्कूल बसमा तोडफोड तथा प्रहरी चौकीमा आगजानी भएको जनाइएको छ।

प्रदर्शनकारी र प्रहरीबिच झडप भयो । प्रहरीले प्रदर्शनकारीमाथि लाठी चार्ज तथा अश्रु ग्यास प्रहार गरेको भारतीय सञ्चारमाध्यमले जनाएका छन् । दिल्ली प्रहरीले अवस्था नियन्त्रणमा लिएको बताएको छ ।

सीलमपुरमा भएको घटनामा २१ जना घाइते भएको प्रहरीले बताएको छ । घाइते मध्ये १२ जना दिल्ली प्रहरीका र तीनजना ¥यापिड एक्शन फोर्सका सदस्य रहेको जनाइएको छ । पाँचजनालाई नियन्त्रणमा लिएको प्रहरीले जनाएको छ ।

यसैबिच जामिया मिल्लिया इस्लामिया विश्वविद्यालय र आसपासका क्षेत्रमा गएको आइतबार भएको हिंसात्मक प्रदर्शनलाई लिएर दिल्ली प्रहरीले कांग्रेसका पूर्व विधायक आसिफ खानविरुद्ध आरोप पत्र दायर गरेको छ ।

जामिया क्षेत्रमा भएको हिंसामा संलग्न भएको आरोपमा दिल्ली प्रहरीले मंगलबार कांग्रेसका पूर्व विधायक खानविरुद्ध जाहेरी दर्ता गरेको हो ।

यस्तै दिल्लीको साकेत अदालतले जामिया मिल्लियामा भएको हिंसाको अभियोगमा प्रहरीले पक्राउ गरेका ६ जनालाई १४ दिन न्यायीक हिरासतमा राख्न आदेश दिएको छ ।

देशभर अवस्था बिग्रिँदै गएका बेला विपक्षी पार्टीहरुकी नेतृ कांग्रेस प्रमुख सोनिया गान्धीसहितको टोलीले राष्ट्रपति रामनाथ कोविन्दसँग भेट गरेको छ ।

कांग्रेस प्रमुख गान्धीले राष्ट्रपतिसँग नरेन्द्र मोदी सरकारप्रति गुनासो गरिन् । सरकारले शान्तिपूर्ण प्रदर्शनलाई कुल्चिने प्रयास गरेको उनले बताएकी छन् । लोकतन्त्रमा जनताको आवाज दबाउन नसकिने उनले बताइन् ।

तर केन्द्रीय गृह मन्त्री अमित शाहले भने विपक्षीले जति विरोध गरे पनि नयाँ नागरिकता कानून लागु गरेर छोड्ने बताएका छन् ।

यसअघि प्रधानमन्त्री मोदीले भइरहेको विरोध प्रदर्शनमा कांग्रेस जिम्मेवार रहेको आरोप लगाएका थिए । नागरिकता संशोधन कानून (सिएए) तथा नेशनल रजिस्टर अफ सितिजन्स (एनआरसी) को विरोधमा प्रदर्शन हुँदै आएको हो ।

Leave a Reply