Saturday, March 28, 2020

Home > mophosala > मास्क र साबुन लिएर घर दैलोमा पुगे वडा अध्यक्ष न्यौपाने

मास्क र साबुन लिएर घर दैलोमा पुगे वडा अध्यक्ष न्यौपाने

कालिकोट । जिल्लाको तिलागुफा नगरपालिका वडा नं. ५ मा वडा अध्यक्ष टिकाराम न्यौपाने सहितका जनप्रतिनिधिहरु मास्क र साबुन लिएर घर घरेमा पुगेका छन् । बिश्वभरी महामारीका रुपमा फैलिएको कोरोना भाईरसको संक्रमणबाट जोगिन सचेतना जोगाउदै वडाका जनप्रतिनिधिहरु मास्क र साबुन लिएर घर घरमा पुगेका हुन् ।

पछिल्लो एक साता भारतबाट गाँउ प्रवेश गर्ने युवाहरुको संख्या दिन प्रतिदिन बढ्दै गएकाले साबुन पानीको प्रयोग गर्न, मास्कको प्रयोग गर्न र भारतबाट आएका व्यक्तिहरुले आफ्नो घरमा १४ दिनसम्म छुट्टै क्वारेन्टाईनमा बस्न आग्रह गर्दै घर घरमा पुगेको वडा अध्यक्ष टिकाराम न्यौपानेले बताए । नेपाली कांग्रेसबाट निर्बाचित वडा अध्यक्ष न्यौपानेले आफ्नो वडाका ६ सय नागरिकलाई मास्क बितरण गर्नुका साथै २ सय ३० घरधुरीमा दुई चक्कीका दरले ५ सय ६० साबुन पनि बितरण गरिएको जानकारी दिए । उनले भने, गाँउमा कोरोना भाईरसको निकै त्रास छ ।

भारतबाट फर्केका नागरिकहरुबाट यसको संक्रमण बढ्ने जोखिम पनि उत्तिकै छ । यति बेला हरेक नागरिकहरुले आफु बच्न र अरुलाई पनि बचाउन जिम्मेबार हुन आवश्यक छ । हामीले वडाका प्रत्यक घरधुरीहरुमा पुगेर सबैलाई सचेत बनाएका छौँ ।

कर्णाली राजमार्ग अन्तरगतको जुम्ला सुर्खेत राजमार्गसँग जोडिएको नगरपालिका भएकाले यहाँका नागरिकहरु थप त्रसित छन् । दैनिक रुपमा खचा खच भारतबाट आएका नागरिकहरु भरिएका गाडीहरु सडकमा गुड्दा थप जोखिम बढेको छ । तिलागुफा नगरपालिकाले नगरपालिका प्रवेश गर्ने हरेक व्यक्तिको गाल्जेमा हेल्थ डेक्स राखेर चेकजाँच गर्न सुरु गरेको छ ।

नगरपालिकाले कोरोनाको लक्षण भएका व्यक्तिहरुलाई नगरपालिकामा प्रवेश गर्न नदिई छुट्टै क्वारेन्टाईनमा राख्ने व्यवस्था मिलाईएको नगरपालिका प्रमूख रतनबहादुर शाहीले बताए । उनले कोरोनाको संक्रमणबाट जोगिन उच्च सतर्कता अपनाउन नगरवासिलाई अपिल पनि गरेका छन् ।

Leave a Reply